雖則話政協委員呢個名銜，主要係為國家提供意見，畀人感覺係做花瓶，但由於都係建制圈內身份地位嘅象徵，歷屆就算係省市嘅特區港澳委員名單，亦為政圈帶嚟唔少啟示。好似最新鮮滾熱辣嘅江蘇省政協委員港澳區特邀人士名單，亦可堪玩味，尤其一男一女「雙胡」上榜，更令人嘖嘖稱奇。
「進念．二十面體」藝術總監胡恩威今次榜上有名，喺香港文化藝術界都引起熱議，但點受注目法，都唔及另一位胡姓女士，就係祖籍江蘇、民政事務局前局長何志平嘅太太胡慧中，風雨飄搖之際仲力保政協位置不失，係咪可圈可點先？
提到香港最出名嘅江蘇界代表，當然係身兼全國政協常委嘅政務司前司長唐英年啦，佢成立咗香港江蘇社團總會兼做會長，仲唔算係代表人物？睇番新一屆委員，咁啱亦有唔少人同唐唐有啲關係，好似支持佢參選特首、狙擊689嘅自由黨榮譽主席田北俊囝囝田啟文，順利連任；唐唐胞弟唐慶年以及唐唐曾加入過嘅自由黨，黨員趙式慶胞姊趙式明亦係委員。
岳少三女有份
但上述三男都唔及一位登場新女咁耀目，就係唐唐另一老友、麗新集團林建岳嘅千金林顥伊。八方問過顥伊，佢對獲任委員好開心，透露早年喺機緣巧合下，有位uncle叫佢參加蘇港澳嘅青年論壇，透過論壇開始認識江蘇，大讚呢幾年江蘇省GDP增長潛力無限，物產豐富兼文化歷史好雄厚，就算係當地嘅美食文化都可以向外推廣，由於自己仲係新丁，會向前輩學習，預計會多就保育歷史文化方面提供意見。
而中大前校長劉遵義太太劉麥嘉軒同前亞視執董盛品儒等，同樣上榜。
李八方