周中夜馬轉移陣地，本周三（24日）唔跑快活谷，馬會安排沙田跑八場泥地賽，係不少馬匹望穿秋水、等咗好耐嘅日子，其中角逐五班1200米泥地賽、葉楚航馬房的「赤水神駒」就係其中一員。
四歲的「赤水神駒」上陣至今1冠13負，賽績已說明唔易贏，本身開齋一役，就係今季初9月24日五班泥地1200米，當時在潘頓胯下大勝對手3.25馬位，泥地性能顯然不俗。之後加分升上四班，四戰均不入圍，最近兩仗更安排跑草地，求減分之心顯而易見。
「赤水神駒」去年11月22日落第後，低過40分降回五班，便無再安排上陣，等足兩個月，無非等今次五班贏馬路程才復出；缺陣期間操到足，共試兩課大閘，可說有備而臨，部署明刀明槍。
自季初9月24日贏馬後，潘頓再無沾手「赤水神駒」，皆因此駒升上四班孭輕磅，潘頓造不到磅被逼分開，但今仗降回五班出戰負131磅，據知幕後即重召潘頓執韁，相隔4個月，潘頓終於等到再策「赤水神駒」，又有贏馬機會了。