這天（21日）沙田馬場焦點之一是沈集成負傷督戰。呢位華人練馬師剛周四（18日）早上在馬房內攔截馬匹時，被撞斷三條肋骨及面部，肺部亦受衝擊，雖被醫生勸諭要多休息，但佢堅持今午入場，履行練馬師職責。
結果皇天不負有心人，沈集成於第五場四班1400米，現場見證旗下「按得澄」由潘頓大熱開齋，單Win及組合獨贏A1分別派34.5及20.5元。
近距離所見，沈集成行動尚算自如，精神面貌亦算良好，唯一表面傷勢是左邊面頰貼上一片小膠布遮住傷口。當「按得澄」勝出後，馬主聯同親朋戚友共廿多卅人齊拉頭馬，場面熱鬧。
不過沈集成自爆自己傷得頗重，要食兩粒強力嗎啡藥丸止痛入場，全身傷勢亦要半年才痊癒。
講番「按得澄」呢匹五歲新西蘭自購馬，沿途守第五位，克服133頂磅，末段以頸位之先衝贏對手，第三季在港出賽第12次上陣，終於打開勝利之門，本身季內六戰僅一次跑第六冇獎金，餘下五仗獲一至五名各一，表現可謂準繩。
勝出「按得澄」的潘頓繼續有貨交，累積贏到跨年連續第15次賽事未斷纜，目前有53Win，落後領先的雷神五Win排第二，保持爭霸機會。
第五場二至四名順序為「駕悅」、「超凡夢想」及「帝勝之星」，四重彩派一萬一千幾。