政府成日話冇地建屋，但有啲地方卻郁都唔肯郁，好似粉嶺高爾夫球場用地咁吖，唔少人都覺得可以改劃喎。民主黨趁球場將於2020年約滿到期，喺去年12月31日至今年1月10日進行電話調查，發現70%受訪者認為香港哥爾夫球會過度佔用土地，逾90%受訪者認為土地應重新規劃。
至於改劃方向，56%受訪者話應發展為公營房屋，17%撐建政府或社區設施，12%認為可建私人住宅。
民主黨立法會議員尹兆堅話球場佔地170公頃，應重新規劃，收回土地發展房屋，唔可以用增加開放時間作續租理由，亦唔應以有古樹或古墳作拖延，並指西貢滘西洲都有高爾夫球場，使用者可以轉去西貢打波，促政府盡快完成私人遊樂場地契嘅檢討。
至於土地專責小組成員開會討論有關用地時，尹兆堅話部份委員係高爾夫球會成員，不應參與討論。