皇家馬德里周四晚喺西班牙盃半準決賽首回合，作客另一支西甲球隊雷加利斯，結果憑馬高阿辛斯奧喺完場前入球，一球小勝對手。
銀河艦隊喺踏入2018年後，只曾喺西班牙盃贏過紐文西亞3:0，之後嘅兩場聯賽同埋盃賽只錄得兩和一負嘅成績。比對上仗喺巴拿比奴0:1不敵維拉利爾嘅陣容，皇馬教練施丹喺今仗做咗九個調動，只係保留咗中堅華拉尼同埋右閘丹尼爾卡華積，前鋒基斯坦奴朗拿度同埋翼鋒加里夫巴利，甚至唔喺大軍名單裏面。
皇馬今仗早喺上半場15分鐘就被迫做出第一個調動，由拿祖費南迪斯入替捷西斯華利祖。儘管皇馬喺控球方面攞到明顯優勢，但喺比賽裏面就少有成功炮製攻門嘅畫面。75分鐘，雷加利斯中場比奧維嘅射門俾皇馬門將卡斯拿撲出。久攻不下嘅銀河艦隊終於喺完場前一分鐘打破僵局，由迪奧靴南迪斯左路傳中，馬高阿辛斯奧喺前柱小禁區位置第一時間窩利射入，皇馬領先1:0。
呢個比數亦企到尾，皇馬喺西盃半準決賽首回合作客小勝1:0，次回合賽事喺下周三上演，到時就會去番巴拿比奴舉行。近期咁頹，皇馬小勝算係幫到施丹鬆一口氣喇！