《蘋果動》主辦嘅配對節目《愛情DQ掣》，正在為參加者準備第二次約會，趁有空檔，同大家傾吓「條件」兩個字。
點解講「條件」？因為節目最初係話，「為有條件嘅單身男女而設」，雖然十位參加者未必全部都十分有條件，但算係比上不足，比下有餘，亦勝在全部都係後生仔女，仲有「青春」呢個條件。
製作組採訪咗配對公司Lunch Actually，其香港區總經理林雪詠話，現實中，多數客人都係30歲或以上，「尤其女士，過咗30歲就好急想搵對象。」林話佢哋嘅客人以專業人士為主，例如工程師、IT、護士、老師等，基本年薪都有25萬或以上，亦正正因為佢哋喺經濟上、教育程度上條件唔差，所以揀對象時，會設定咗「擇偶條件清單」，話想搵點點點嘅人。林雪詠話遇過離地客人，「女士嘅會向錢看，最離地係要求男士有百萬年薪或以上，否則唔會考慮；而男士主要要求外表，最離地嘅，係希望我哋搵似某某藝人嘅對像畀佢。」
條件太高會變成阻礙，不過，有時話就話有條件，其實又未必存在。最初製作組揀選參加者嘅時候，都暗地裏為佢哋配對過，好似泰拳Debby喺表格寫，希望對象職業係IT，就以為佢同有樓男Steven會配對成功，點知Debby揀咗幽默Youtuber浩嵐。銀行仔Derek就喺表格寫，希望對象係老師，點知Miss思雅唔係佢杯茶，都係揀靚女法拉bb Sumi同泰拳Debby。傳聞話有樓有高潮，結果幽默先成為全場亮點。
林雪詠話，其實唔少客人都唔清楚，自己搵緊一個點樣嘅對象，「試過最誇張嘅客人，約會咗40至50次都唔成功，其實大家要明白，愛情唔係符合到條件，就相處到。」佢又話，有時客人都未必察覺自己有咩問題，「有女士會認為，如果男士鍾意我，就會鍾意我所有嘢，唔使化妝，做啲假嘢出嚟，但係男士都係視覺系動物，第一眼都唔鍾意，已經無晒機會。」
男士係視覺系動物一啲都無錯，好似喺初次見面時，五位男參加者中，佔咗三位包括有樓男Steven、文青Daniel同銀行仔Derek，佢哋嘅第一印象都落喺外表好似陳法拉嘅Sumi度。所以，對於去約會時嘅打扮，林雪詠建議女仔最好化淡妝、着長裙同高踭鞋，男仔就以整潔為主。
林雪詠話如果想脫單，有三點要記住。
1. Be The Right One(做對的人)
要求別人有條件嘅同時，問問自己係咪準備好，係咪有條件做人哋嘅男/女朋友，先從自己著手，注意外表，提升談吐技巧，學習同異性相處。
2. Choose The Right One(選對的人)
縮窄條件清單範圍，只選三個必要條件和三個必定不可接受條件，增加有潛質嘅對象人數。
3. Meet The Right One(見對的人)
好好安排每日行程，切忌只顧工作，要抽時間出去約會認識朋友。
而首次約會，以配對方式嘅話，林雪詠建議最好食飯傾計，會最有效咁互相了解，佢話，「第一次見最好傾啲生活化話題，譬如興趣、旅行等，唔好講太多工作，因為一講起工作就會好多嘢呻，講老闆或者OT，就會出現好多負能量。」
主持：何宛珊 (表妹)
撰稿：仙
攝影：Neo、馮桑明、梁依能
後期：馮桑明
視覺設計：Cammie
監製：仙