早前日本賽艇協會嘅書法海報，將「挑戰」顛倒變「勝利」，神級文字設計令唔少人嘆為觀止！其實本土唔少藝術家，都有類似神級技能，新晉靚女書法家「築墨青」就喺今個新年同青衣城合作，設計多款別注賀年書法，特別之處係當中有個「福」字反轉後，會成為疾走奔馳嘅「狗狗」圖案，呢種雙向書法都令人嘖嘖稱奇。
築墨青畢業於中大建築系，副修藝術，原為註冊建築師；鋼琴考到八級又同時係香港女子甲一排球員，果然文武雙全。10年前因為排球比賽受傷休息，同媽媽一齊學書法，自此欲罷不能，4個月前仲放棄高薪厚職追夢，喺社交平台IG創立書法專頁㖭，佢擅長將傳統書法融入可愛畫風，視覺效果夠晒fun，難怪有唔少粉絲，佢將喺2月10同11日駐場，為粉絲喺許願牌題字㖭！