正所謂「每逢監禁倍思親」，就好似黃之鋒咁，噚日就控告警隊一哥嘅索償案再上庭，雖然有香港眾志啲friend子嚟撐佢，但佢隔住犯人欄大聲尋親：「錢詩文呢？又話嚟聽嘅？」見之鋒問女朋友去咗邊，公眾席嘅林朗彥最初答唔出，結果要「打電話問觀眾」先解答到呢條一百萬嘅題目，㩒咗陣電話就搶答：「錢詩文仲瞓緊。」
心繫補選 勉黨友加油
佔旺清場案刑事藐視法庭罪成嘅之鋒，噚日坐緊第3日監，身為原告梗係要去小額錢債審裁處出庭，但民事法庭不嬲冇犯人欄，咁佢就唔可以經羈留室通道出庭，八方仲心諗，唔通要鎖晒手銬腳鐐咁「塔」住佢上嚟？原來司法機構特登轉場，去平時做開刑事案嘅法庭開庭，之鋒可以行出嚟坐喺原告席，但旁邊有警察同懲教署人員做「左右護法」，坐喺度傍到實一實。之鋒都知坐監阻住單案嘅進度，向審裁官建議下次押後最好係3月17號佢服刑完畢之後。
身陷牢獄嘅之鋒仍然心繫立會DQ補選，散庭個陣一邊行番入囚室，一邊鼓勵黨友「加油！打贏場選戰！3.11記得投票！」