特首林鄭月娥首創嘅立法會特首質詢時間，終於訂好喺今個月31號上午11點舉行。噚日內會主席李慧琼就話，呢個質詢時間一共有半個鐘，每位提問嘅議員有3分鐘時間問題，問完冇得做補充質詢，而林鄭就唔會有開場白，換言之半個鐘嘅時間都係一問一答。民主黨林卓廷就心水清，問李慧琼如果3分鐘內問晒答晒，咁剩低嘅時間都唔問得咩？李話相信立會主席會睇情況嘅，因為同一般事務委員會安排差唔多。得3分鐘睇嚟大家都唔好太期望林鄭答到啲乜啦。反而議員中籤提問累積次數係計埋落傳統答問大會度，咁似乎留番個名額喺答問大會問林鄭好過。