盛傳都會被選舉主任取消參選資格嘅香港眾志周庭，噚日報名參與港島區3.11補選，自然成為中外傳媒焦點。
解釋眾志非支持港獨
佢報名前接受傳媒提問，臨近結束時，突然有外媒爆出一條日文問題，在場記者當然唔知問題係乜，但周庭即時以日文回應，流暢程度直達日本人，唔少在場記者都非常驚訝。
八方都問過周庭，究竟日媒問啲乜？周庭話呀，當時日本記者係查詢香港眾志係唔係支持獨立？佢已經即時回應話，香港眾志從來唔係支持港獨嘅政黨。
查實周庭哈日就係人都知，佢亦曾透露，靠睇日劇等自學日文，估唔到成績非凡。八方大讚佢日文講得流暢時，佢就好謙虛咁講，其實自己只係「BB班」。
講到選舉辛唔辛苦時，佢就話會盡力做，希望可以幫民主派全取4席！
周庭一旦入閘，建制對手就係新民黨南區區議員陳家珮，但近日有位男士加入呢場人妻VS學生妹大戰，「維園阿哥」任亮憲今日（19日）舉行記招宣佈以獨立人士身份出戰補選，一班財金界人士如周顯同沈振盈等會撐場。
維園阿哥今報名狙擊
任亮憲早前已向周庭下戰書，希望同佢公開辯論，任亮憲口才有幾犀利，2016年九西立會選舉論壇大家已經見識過，任亮憲點狙擊黃毓民。
若然佢向周庭出招，殺傷力唔細，難怪有人覺得佢係𠝹民主派選票。周庭可以點反擊？有政圈花生友獻計，叫周庭表明我不是周澄，睇吓維園阿哥會唔會招架乏力？
李八方