阿仙奴冬季大特賣繼續進行，一月份賣走咗中場高基連，翼鋒禾確特亦喺周三正式以2,000萬鎊轉會費過檔愛華頓，下一位冬季離廠球員，好大機會係山神阿歷斯山齊士，連領隊雲格都喺周四記招，承認山神好大機會走人。消失咗幾日嘅山神，日前終於喺倫敦街頭被捕獲，見佢剪定個靚頭唔通為轉投新球會做準備？英媒亦傳曼聯為簽山神絕對不惜工本，開出超筍條件，令山神成為史上首位周薪突破50萬鎊嘅英超球員！
禾仔走埋，下一個離開兵工廠係邊個？好大機會係山神。據報曼聯以本傷人最有機會簽到呢位智利球星，開出一份總值近1.2億鎊（約13億港元）嘅四年半合約，仲已經同山神傾掂數。呢嚿錢係咩概念？即係周薪高達50.5萬鎊（約547萬港元），遠超目前英超最高薪、周薪29萬鎊嘅曼聯中場保羅普巴，創英超球員史上最高人工紀錄。
山神目前喺阿仙奴嘅周薪大約係14萬鎊，曼聯出手咁重你話點會唔心動。紅魔亦希望可以喺周五前完成到呢單交易，可以註冊得切，等山神可以喺周六對般尼嘅英超比賽上陣。
雲格話好大機會成事
阿仙奴上場英超作客般尼茅夫輸1:2場波，領隊雲格將山神剔出大軍名單，消失咗幾日，終於喺周三喺倫敦被影到，見佢剪完髮行街，其中一張相咁啱佢後面間舖頭，櫥窗上貼咗兩張「WINTER SALE（冬季大減價）」，對阿仙奴嚟講認真應景。至於雲格喺周四記招，承認山神轉會好有機會成事：「冇錯，（未來24小時內）隨時可能公佈消息。當然，轉會市場冇絕對，山齊士可能會喺周六比賽上陣。」雲格亦表示歡迎曼聯嘅交易籌碼米希達利恩，以及否認會買奧巴美揚同埋準備斟中堅莊尼伊雲斯。
