立法會噚日喺分組點票下，通過由民建聯陳克勤提出，不就毛孟靜譴責何君堯議案採取任何行動嘅議案。避過被譴責嘅何君堯喺甩身後同傳媒講，今次係好嘅結果，向外展示港獨冇出路，形容「陽光穿透了烏雲」。
其間何君堯突然批評，民主黨尹兆堅「話人哋唔啱」，但「有口話人冇口話自己」，曾犯無牌駕駛、冇有效行車證、冇第三保，至今仍然駕駛進出立法會。路過嘅尹兆堅聞言後上前同佢對質，強調自己只係行車證過期，唔係揸「大膽車」，又明言自己有第三保，要求何君堯拿出證據，批評對方身為律師卻亂講，「證明到今日嗰件事你係一個亂講嘅人」。
何君堯就話稍後會上載有關圖片到社交網站，講完就走並明言唔道歉，阿尹就向何斥責：「接律師信啦何君堯，不知所謂！」