內地各省市政協換班後，新一屆全國政協委員名單稍後亦出爐，雖然只係諮詢式花瓶，但香港政界依然關心特邀港區人士中有幾多人入圍？由於唔少常委年近70又或已連任三屆，例如陳永棋、鄭家純同吳光正等，如無意外都要講byebye。除咗唔少人傳過嘅社團阿頭譚錦球等，八方聽聞全國政協委員嘅工聯會會長林淑儀，連同民建聯主席李慧琼都有可能升呢做政協委員，香港兩大紅色政團女當家，齊齊做阿爺最重要嘅「花樽」。
而對於唔少政商界而言，名單上有冇一個名字，先係焦點。就係現為全國政協副主席嘅董建華！一嚟前特首梁振英喺卸任後獲任政協副主席，一直有聲音話香港無理由有兩個副主席位，加上最近中美外交風雲，例如何志平案以及新鮮滾熱辣，美國德州大學奧斯汀分校拒絕接受阿董嘅中美交流基金會嘅捐款啦，都令人猜測身為阿爺美國特使嘅老董，𠵱家嘅價值有冇今非昔比？