流感肆虐，就連澳門行政長官崔世安（吹C安）都中招！澳門政府發言人辦公室噚日話，崔世安感染一般流感症狀，醫生診斷係流感，需要留喺屋企休息同接受隔離。崔世安星期二已經休假，直至聽日，其間會由行政法務司司長陳海帆代理行政長官職務。
對疫苗過敏冇打針
澳門衞生局局長李展潤證實，澳門呢位揸fit人係喺星期二確診患甲型流感，𠵱家情況已經好轉，大家毋須擔心。雖然當局冇交代到崔世安點解會中招，之不過李展潤就透露，崔世安冇打流感疫苗，原因係佢對疫苗過敏喎！八方相信今次吹C安中招，一定會令公眾意識到，打針先係預防流感嘅最佳方法，話唔定係佢患病嘅另類「收穫」。
至於一海之隔，香港特區政府嘅好打得女特首林鄭月娥又如何？特首辦回覆指，娥特一早就打咗流感針喇。