雖然賽馬運動在內地唔係主流項目，但唔少地方都定期有馬跑，當中既有平地賽（速度賽）亦有馬術賽。
近日網上流傳一條內地跑馬片，內容關於上年5月21日在武漢東方馬城舉行的2017年武漢速度賽馬公開賽第三場。
該場沙地1000米唔係平時本港比拼嘅純種馬賽事，而係屬於新疆伊犁馬比賽，後者為正宗國產馬匹，全場共有七駒跑，最終卻有四名騎師墮馬。
從片段中睇到，第一位墮馬嘅騎師在鞍上打咗兩鞭之後，非常突然咁失平衝，向左挨後就落咗地，不過騎者好快就企番起身。之後率先透出嘅2號馬突內閃再外閃，走勢相當稚嫩，鞍上騎師最終選擇跳馬以保平安。
至於呢次意外同時間波及後面高速跑緊嘅馬匹，當2號馬騎師倒地後，幾乎俾最前嘅7號馬踩中，7號馬騎師惟有同佢一樣跳馬自保，然而急劇外閃嘅2號空馬同4號馬火星撞地球，令後者人仰馬翻，場面相當混亂，最終只得三匹馬能在騎師胯下完成賽事。
睇完呢條片嘅網民都對賽事結果大感驚訝：「賽果真係峰迴路轉」、「點解騎師可以唔顧安全自己跳落馬」；亦有網民指賽事過程刺激過英超利物浦嘅比賽：「仲刺激過利記踼波」；還有網民質疑墮馬背後原因：「最直接嘅造馬方法」。