新年除咗拜年，成家人去主題樂園玩都係個唔錯嘅選擇。迪士尼今年首設新春市集，大玩懷舊feel將米奇融入傳統美食例如雞蛋仔、缽仔糕（圖），仲有賀年精品出售，市集即日起每晚6點營業；大年初一到年初五入場嘅遊客仲會獲派一封布魯圖福氣利是，內附購物優惠券同朱古力金幣。
如果想住埋酒店，本月31號前訂房仲有限時優惠，最平1,356元、即原價約六折就book到一間標準客房。迪士尼3月起每日傍晚喺美國小鎮大街上演全新投影騷「We Love Mickey！」。
海洋公園今年就同YMCA FARM合辦首個新春賀年市集，初一啟市開足10日，大賣懷舊手作及經典街頭小食，仲請咗台灣九天民俗技藝團每日上演6場匯演，每晚7至11點免費開放。