雷神停賽，其他騎師紛紛趁勢起孖，這晚（17日）谷中第七場三班一哩，田泰安夥拍徐雨石馬房「靚紫荊」後上掄元，單Win及組合獨贏A2分別派77及18.5元。田泰安連同第二場贏霍利時馬房「常妙星」，成為繼郭能後全晚第二位起孖騎師。
五歲澳洲自購馬「靚紫荊」上仗在雷神胯下入Ｑ不敵再出再贏的「威信」，呢次雷神停賽換田泰安，繼續跑三班谷中一哩，開跑時為7.7倍半冷。沿途「靚紫荊」留住跑守尾列第十位，末段在田泰安力鞭下，發揮強烈衝刺，及時追過一度突圍的冷馬「藍海策略」，險勝一頭位，「靚紫荊」第11次在港出賽終於開齋。
至於「藍海策略」偷襲失手做二奶，所屬馬房麥菲文整晚出三駒全第二，都算黑到冇朋友！
大美人李嘉欣今晚與丈夫許晋亨十指緊扣現身，為今場許晋亨父親許世勳名下馬「估惑」打氣，雖然許世勳上周三（10日）以「獻惑」勝出，成為本港首位馬主贏得100場頭馬，旺氣十足，而「估惑」上仗亦得亞軍近績甚佳，但今仗「估惑」卻演出走樣，早段居前列，直路卻腳軟墮退，3.9倍大熱只跑第九名，令李嘉欣失望而回。
田泰安勝出今場「靚紫荊」後，累積44分拋離所有對手，提前勝出騎師王。
第七場二至四名順序是「藍海策略」、「金獅叻將」及「心慷慨」，四重彩派五萬二千幾。季軍「金獅叻將」練馬師霍利時跑完前七場，出五駒豪奪兩冠兩亞一季，上名率高達一百巴仙。