【今周主題：貴價前鋒係水貨?】
作為一個祖記球迷，其實幾難相信艾華路莫拉達（圖）嘅實力會俾人質疑。畢竟當年都係佢帶領祖雲達斯擊退皇馬，殺入歐聯決賽。而重返皇馬之後，亦以後備身份，一季入多過廿球，咁點解莫拉達轉戰英超又會迷失呢？
到底達仔算唔算差？以入球量計，喺英超射入10球，翻查紀錄，原來只係佢職業生涯第二次為一支球隊喺聯賽取得雙位數入球，半季計都可以收貨。但以近一個月表現嚟講，真係只能用差嚟形容。除咗月初對阿仙奴多次失機外，唔少比賽，一般前鋒要做到嘅控球，背住龍門攞波或搶點，達仔都顯得有啲力有不逮。
早前利物浦名宿列納表示，今個球季係莫拉達職業生涯首次無歇冬，捱過聖誕新年快車檔期，疲勞已經拖垮咗佢。更大問題係，季初達仔雖有唔少精采嘅頭槌入波，但呢類靠靈活走位搵食嘅前鋒，本身喺英超就難生存。儘管干地已經改踢3-5-2，用法比加斯餵波遷就，但半季嚟講，英超後衞似乎已經摸熟莫拉達嘅踢法，相信達仔迎來咗佢喺英超嘅新秀牆，有待突破。
文:亨少