新民主同盟范國威（咖喱范）勝出民主派新東初選後，如何處理過去同白鴿黨嘅「牙齒印」，成為唔少花生友嘅話題。白鴿黨議員林卓廷噚日就話，對於咖喱范勝出初選，「我真係恭喜佢啊」，透露早前收到咖喱范周五報名參選嘅邀請，可惜佢公務纏身，已回覆「未能出席」，慨嘆「緣份嘅嘢真係冇得講」。
阿廷解釋，自己過去從未主持過委員會會議，點知立法會交通事務委員會主席易志明因身兼天星小輪董事，為免有角色衝突，周五要佢呢個副主席代主持會議，「我冇得選擇，唔行得開」，但話黨主席胡志偉會到場，夠晒份量。阿廷話，回覆咖喱范時已祝佢成功當選，形容咖喱范亦深明大義，叫佢「公務為先」。問到白鴿黨新東支部會點撐咖喱范？阿廷就話「我哋大局為重，過去嘅嘢全部唔提」，形容現時大敵當前，槍口要一致對外，黨內會盡力去動員，但最重要係要說服到啲義工幫手囉。