眨吓眼馬季過咗三分一有多，又到本港一堆四歲馬爭餐死嘅時間，四歲系列頭關香港經典一哩賽，喺周日（21日）沙田馬場就上演喇。
上年經典一哩賽，「佳龍駒」毫無懸念下以兩馬位壓倒性贏出，返嚟今屆賽事，一望埋報名表度，只看得出一個字：亂！
雖然有六戰五冠一亞評112分嘅「當家精選」，比排第二高分嘅「時時精綵」高成10分，但「當家精選」未跑過一哩喎，在港同父系馬仲要只贏過1400米，呢次「當家精選」跑多200米，氣量呢點絕對夠俾一個黑人問號。若以級數嚟講，「當家精選」要贏經典一哩賽，五隻手指公為滿分，此駒頂盡得四隻手指公。
其實呢堆馬入面，贏過沙田1600米嘅馬唔係好多，當中就只得「紅衣優駿」同「志趣相投」贏過，隨時笑裏藏刀，殺你一個措手不及都唔奇。
尤其「紅衣優駿」，由今季先開倉嘅羅富全訓練，如果咁都贏到，馬房招牌真係省到立立靚，肯定鬥志如虹。
邊線些少少嘅話，「時時精綵」肯定走唔甩，話晒前仗1600米入Ｑ只輸半馬位俾灰獸「五十五十」，之後「時時精綵」都喺2000米補中，黑馬王子仲唔係你？