36歲「大隻Otto」陳志健由2006年香港先生，到十二年後今天，由健身操肌，玩到泰拳、西洋拳boxing、上擂台打慈善MMA，拍劇同時搞網上平台，亦任私人健身教練，生活全方位圍繞住運動。「運動畀我最大嘅得着，係鬥志同態度！」愛演戲，更希望將打拳體會的道理搬上幕前，「打拳就似人生咁，有快有慢，亦有你要停下來嘅時刻。」
採訪：林妙萍
攝影：周樂恒
化妝：Jennifer Yip Pui Yan
場地提供：VO2 Sky
服裝提供：Ultim8 FightWear
用具提供：Fitbox
鳴謝：Jayson Wong、Sky
採訪當日，陳志健拍完通宵劇，趕到銅鑼灣的健身中心，訪問期間要不停做健身、舉動講解，打拳拍片，做完訪問再趕回觀塘再拍劇，連中心的冠軍拳手Jayson亦指Otto勤力度堪比職業拳手。
雕琢身形
有幾搏？ Otto上月為拍無綫新劇《兄弟》的一場拳擊，四日內激減15磅，由158磅減到143磅！「係我自己有啲執着，因為打西洋拳磅數係好重要，對打嘅伍允龍145磅，咁大家同一磅數、身材差唔多，打出嚟會好睇啲，所以我就要落15磅。」四日非人生活，如常拍劇，每日持續操練二、三小時有氧運動、器械及boxing等，「食方面更坎坷，會減澱粉質，粥粉麵飯全部唔食，只食烚雞蛋、白烚雞胸肉同魚肉，為咗要線條更好，最後一日仲要係完全唔飲水。呢個減法，真係唔建議大家做！」
捱足四日，拍了三個多小時，最終出街的鏡頭，大約只有兩至三分鐘，值唔值？「值！要對自己有要求，冇要求，好弊㗎！」他笑言清晨6時拍完回家，火速食了一碗杯麵，「嘩，個世界好美滿，好開心。」訪問全程，Otto由如何從坐姿、拎筷子等小習慣開始，無間斷講解如何令身體這個「爐頭」，一直維持住同一火力，減慢衰老，保持健康。講到健身的人如同雕刻家，可以雕琢自己身形；拳手要講左右腦協調，再講到呼籲女士們不要只為減肥而做運動等，流着運動熱血。他亦教授明星如黃宗澤（Bosco），做上市公司主席等私人健身教練。
Bosco教練
問到教普通人和明星最大分別時，Otto謂不只是價錢，更是達成度，「佢哋一般有好勁嘅mind set，要做，就一定要做到；我有client係06返工，佢會04嚟健身；Bosco嘅操法亦唔係好多人跟到，因為真係好辛苦。」
愛打拳、健身，Otto最愛原來都是做演員，「教練或其他，都係錢嘅來源，我立場一定首選拍嘢，因為現階段我仲有好多角色係未做過，好想試，好似之前演一個精神病患角色，好鍾意。」身在上海演出《紙飛機的天空》舞台劇，「2018仲有好多嘢想做，我有個古仔係講關於拳擊，想做網劇，𠵱家搵緊投資者，同埋個健身平台，有時間都會執一執番。」難怪他的facebook hastag，最常見到是#天道酬勤。
Otto 2012年在《拳王》演阿力，同年和羅樂林女兒羅苡芝結婚，他形容太太是「上天畀我好好的禮物」，拍劇拍到日夜顛倒、五組劇同時開的日子，太太可以體諒，「因為爹哋媽咪都係做呢行，佢好清楚我哋，亦畀好多自由度、時間我，就算幾忙，都會偷時間見，拍完嘢，或者朝早跟佢車返工，喺佢公司附近食個早餐咁，偷時間見。」太太唯一反對，就是他再上擂台打拳賽。
三分鐘六招收腹
OL在辦公室經常坐，難免有肚腩。陳志健設計了一套每日三分鐘，瞓在床上也可以做的收腹法。收腹法以六組動作為基礎，每組做30秒，乖乖跟住做，兩星期應可見效。
第一組V形上舉
上時呼氣，落時吸氣，盡量做慢些。
貼士：可交叉手加強力度
第二組捲腹
主要鍛煉上腹肌肉，類似sit-up動作，上時不用上太高，謹記放鬆頸部及後腰下壓。
第三組 踢水
左右腳凌空踢水，上下幅度不用太大，動作越慢越好。
貼士：謹記保持正常呼吸，切勿閉氣。
第四、五組橫側腰鍛煉
單腿交叉，以另一邊身向上抽，抽上時想像手踭要碰到膝頭。
貼士：做完左面，做右面，謹記上呼下吸的呼吸法。
第六組打圈踢水
同凌空踢水一樣動作，改為打圓圈轉，幅度越細越好，保持速度要慢。
更多精采時尚內容，盡在 http://add.appledaily.com。