【今周主題：貴價前鋒係水貨?】
季初以破球會紀錄嘅4,650萬鎊（約4.69億港元）嘅轉會費，由里昂加盟阿仙奴嘅前鋒拿卡錫迪（圖），近期陷入球荒。自12月初對曼聯入波後，至今聯賽入球維持喺八球，唔少人隨即質疑拿卡錫迪係水貨，表現與身價不似如期；但筆者就認為拿卡錫迪嘅表現尚可，在經常被換且缺乏輸送下，被轟水貨其實十分冤枉。
翻查資料，拿卡錫迪對上四季均在里昂取得20球以上，門前把握力肯定比禾確特、伊禾比之流好；名將亨利亦曾言：「拿卡錫迪嘅走位非常出色，只係運氣差咗少少。」但原來拿卡錫迪20場英超正選入面，雲格竟多達15次將佢換走，試問一個經常俾領隊抽起嘅前鋒，又點可以延續入球信心。
拿卡錫迪並唔係美斯，需要中場球員作出輸送，但目前阿仙奴陣中除奧斯爾外，其他球員似乎都冇法交出致命助攻，導致拿卡錫迪目前英超的場均埋門統計數據，只有可憐嘅2.17次。喺阿歷斯山齊士、奧斯爾盛傳即會離隊下，拿卡錫迪嘅拍擋很可能變成伊禾比、韋碧克等，呢位法國前鋒嘅入球荒將可能延續落去。
文：尊嘉