出名鍾意幫年輕黨友「起機」嘅新民黨主席、行會成員葉劉淑儀，最近無時無刻都同參加港島區補選嘅南區區議員陳家珮（Judy）「行埋」，原來葉太對Judy嘅關心程度，唔只選情咁簡單，仲做埋形象指導，陪Judy買衫！
雖然對黨友戰鬥力有信心，但葉劉不諱言有樣事令佢好驚（唔通係英文？），就係盛傳政府或DQ Judy嘅潛在對手、香港眾志周庭，點解求神拜佛都希望政府唔好拒周庭入閘？因為佢話民意會喺政府一DQ後反彈，到時Judy選情亦會受影響，即係唔輸自己都輸人哋啦。
對於有傳民主派港島區Plan B係南區區議員區諾軒，葉太話如果變成兩個南區區議員互鬥，大家互講地區事務，咁個補選有乜好睇？似乎都覺得，人妻鬥學生妹呢個對決，會令補選更有睇頭。
葉劉仲話議員被DQ過一次，唔等於終身都被DQ，唔知喺特首林鄭同政制局局長聶德權都唔肯孭飛之際，有決定權嘅選舉主任，聽唔聽到葉劉嘅心聲？