冬天跑馬，好多歐洲騎師特別生猛，呢排就有巴度、郭能、李寶利枕住贏馬。其中李寶利這晚（17日）於谷中再有進賬，頭場四班1000米夥拍蔡約翰馬房「精算八方」勝出，單Win及組合獨贏A1分別派33及21.5元，李寶利個人連續第二次賽事贏馬。
四歲馬「精算八方」前仗起專攻谷中以來，均用李寶利，對上兩次分別跑第四及第三。呢次再攻1000米最短途，被捧成大熱門，2檔起步沿途前置守好位，直路於外叠加速一攻而破贏頸位，一併打開今季及谷草勝門，人馬合作亦首度錄得勝利。
今場賽事遲咗少少開跑，原因在於一對新馬「首驫」及「雄偉飛龍」齊齊玩嘢衝閘而出，但均無拋下騎師，最終雙雙重新入閘出賽，並俱落第而回。
其中「首驫」是卓悅老闆葉俊亨名下，其子葉韋彤和歌手女友JW王灝兒拍拖入場撐「首驫」，結果此駒大敗18.75馬位跑尾二第11名，敗興而返。
「精算八方」馬主龐維寧表示已很久沒有拉頭馬，今季第一次拉頭馬，十分開心。龐維寧幽默地說「精算八方」如低班版「首映」，因為蔡約翰對他表示「精算八方」一如「首映」只有1000米氣量，再長一點也未必能應付，所以會主攻快活谷1000米，而今場加了鼻箍對馬兒有正面幫助，很開心可交出頭馬。
頭場二至四名分別為「金飯碗」、「阿凡達」及「爪皇轟天」，四重彩派6,373元。