郭富城、羅仲謙及導演鄭保瑞日前在尖沙嘴宣傳賀歲片《西遊記女兒國》，繼《大鬧天宮》、《孫悟空三打白骨精》後，三人再度攜手合作，城城自詡：「其實我係喜劇演員，阿瑞今次搵我做一個有喜感嘅孫悟空，而且我又抵用，識打又有喜感嘅人係唔多，所以我係最適合嘅選擇。」
雖然和前作一樣，同是飾演孫悟空一角，但兩者差異甚大，外形上亦有變化，但再次演繹同一個人物，城城坦言是折磨：「上次戲份好沉重，所以我講過唔再演，但我身痕，係要折磨自己先痛快，其實只係過咗兩年，我唔記得咗嗰種痛苦。不過當我第一日去到現場，見番個化妝師，即刻打畀小美話『我想唔做』，佢話唔得。」如果再有延續篇，城城揚言不做孫悟空：「我做唐僧！」由於整塊臉要貼上假毛扮孫悟空，導演保瑞直言明白：「我好明白佢嘅情緒，惟有喺拍攝上盡量係順利。」城城亦有另一樣困擾，他說：「就係要箍金剛圈，一脹一熱，我就開始頭痛，呢啲都係我啲皮肉之苦。」
體會太太辛苦
鄭保瑞指謙仔飾演的沙僧，因要穿上緊身肌肉戲服，緊得連手指都發紫，謙仔說：「最辛苦係冇得去大，四個月之內唔可以『絞肚痛』，要控制飲食，因為件衫一着一除要個幾鐘。」
城城現在既是人夫又為人父，問到拍戲會否較以前錫身？城城說：「作為爸爸，更加覺得家庭好重要，唔單只小朋友，對我家人、太太都要照顧，我知佢好辛苦。我作為一家之主，我有工作在身嘅時候，我要專業去做，畀個榜樣我下一代睇到，我反而覺得係更加專注工作，做唔做危險動作，我係唔會改變。」
採訪：黃曉妍
攝影：林賓尼
場地提供：帝樂文娜公館DaDa Bar
