如果要用一個代名詞畀田北辰，八方會揀「反叛」，因為田二少即將又要叛逆一次。是咁的，立法會工務小組噚日通過咗十一號幹線可行性研究嘅撥款申請。正常嚟講，建制派點會唔贊成呢？但二少講到明自己有機會反對噃！
今次政府想起嘅十一號幹線，係由北大嶼山去元朗。二少話，呢條幹線應該駁去青衣先啱，事關按政府嘅構思只係送新西居民去大嶼山，然後經青馬大橋出市區，「既幫不了忙，又為東涌帶來樽頸」，尤其青馬大橋係出市區嘅唯一方法，上次大橋被封而癱瘓咗大嶼山單嘢大家歷歷在目啦。
二少仲表明，如果政府唔考慮佢嘅長遠方案，起多條路由青衣出市區，佢喺財委會投硬反對票。二少真係好堅呀，不過又有咩用呢？喺其他保皇黨保住下，政府又點會怕咗二少一票呢？