噚日杏兒姐夫參選為大家帶嚟笑料，唔少人奇怪，財經事務及庫務局前局長陳家強都有現身支持，到底佢同鄭泳舜有咩淵源？陳家強就話同鄭泳舜識咗10幾年，一認識時已經知道「佢有朝一日會做議員」（佢明明已經係區議員喎……），又話鄭泳舜老婆（即係胡杏兒家姐）係科大校友，所以亦都一早相識，聲言如果鄭日後需要幫手，佢都會瞓身落街站支持。
重返科大重執教鞭嘅陳家強仲自揭，唔少學生原來都唔知佢係前局長，數數手指，佢做咗10年局長喎……佢就睇得好開咁話，大家唔熟時事好正常，而佢唔會特別提前局長身份，不過教到金融政策，都會show吓自己title喎。