新年嘅活動之一，當然係濕平掃年貨，如果周圍仲有啲新年佈置，當然令人掃貨掃得更稱心滿意。而醒獅都可以話係新年吉祥物，見到醒獅出動頓時覺得喜氣洋洋，東薈城都特別喺今個新年，搵嚟最年輕嘅醒獅紮作師傅，製作動感十足嘅新春佈置。
咪以為許嘉雄師傅得嗰39歲，其實佢已經有逾30年紮作經驗，出身武館世家嘅佢，6歲已經開始因興趣學紮獅頭，擅長以傳統紮作技巧加上創意製作創新醒獅。佢今次就搞搞新意思，以花設計各款醒獅，例如以絲花代替獅頭絨球，以繽紛花布作獅被，同傳統醒獅威武勇猛造型好唔同。6隻醒獅將會喺2月2日至3月4日，喺商場入口同二樓天橋出沒，腳踏梅花樁，徐徐向上，借勢祝大家如意吉祥。