【今周主題：貴價前鋒係水貨?】
曼聯前鋒盧卡古（圖）季初係威係勢，季初曾經試過九場入10球，但要留意曼聯季初對手只係韋斯咸、史雲斯之流，但之後嘅Big 6考牌戰，佢就一球都入唔到，好明顯只係對弱隊先識入波嘅「關島殺手」。
盧卡古嘅優勢係步大力雄身體質素好，但控球同個人技術就非常一般，而且走動唔多，經常企喺龍門前面等波頂，呢啲打法對中下游就綽綽有餘。最為人記得嘅，當然就係盧卡古喺曼市打吡戰入面，為同市宿敵送上兩個「助攻」。雖然呢兩個失誤都涉及運氣成份，但盧卡古喺嗰場比賽入面狀態低迷，就算有埋門都係一飛衝天，對唔住9,000萬鎊嘅身價。
盧卡古之前入球荒，咁啱嗰時中場保羅普巴就因傷缺陣，喺參與更多組織進攻工作下，暴露控球差同個人技術不足嘅弱點。當普巴復出之後，盧卡古又真係重拾射門鞋，而史高斯就講過，紅魔要有10號球員去輔助盧卡古，先至可以令佢發揮最大功效。家陣又有傳紅魔買到阿歷斯山齊士，或者佢可以分擔到更多盧卡古嘅工作！
文：聰鳴