王祖藍、阮兆祥同李思捷組成嘅「福祿壽」，今年3月8及9號喺紅館開「福祿壽紅館演唱會2018」，慶祝成軍十周年，今次佢哋再絞盡腦汁扮鬼扮馬。三位主腦前日喺《今日ENT》做直播，宣傳演唱會之餘，仲同一班網民玩live，佢哋仲玩最叻嘅一環「扮嘢」，一開始三個就要互相扮對方答問題，思捷都話三個都扮得好似。
去到第二個環節，福祿壽要抽唔同人物，再扮佢哋答問題，一開始祖藍抽到扮張學友回答「最後話事係邊個？」而祥仔就扮林鄭月娥答「邊個最有錢？」不過祥仔冇正面答，仲話唔講係人都知邊個最有錢，最後只係話財政司最有錢，兼扮謝霆鋒唱《熱咖啡》。
請嘉賓要投票
問到福祿壽如果搞完笑後，冇人笑嘅話點算？祖藍話冇得怕，怕嘅話就唔可以搞笑，祥仔就話會試搞gag，搵啲幕後聽佢講先，好笑先會講出嚟。最後有網民問會請邊個做嘉賓？會唔會請阿姐汪明荃？思捷話：「請到阿姐就發達。」祥仔補充要睇吓邊啲嘉賓同佢哋有火花，所以有諗過全民投票，祖藍就話：「真係要試吓投票，我哋要喺三個鐘入面扮咁多個人，有五百、六百個人選，又要有一定難度，所以好難揀。」
採訪：譚倩宜、蘇美怡
服裝提供：7350nation
場地提供：EMAX九展
