關於阿仙奴當家球星阿歷斯山齊士即將轉會嘅新聞，禮拜二又有新發展，包括《BBC》同《天空體育》等英國傳媒，就話曼城已經放棄羅致「山神」，雖然有傳另一支藍軍車路士介入，但紅魔家陣就出動隊內中場米希達利恩做籌碼，作為交易一部份，而「MK恩」經理人拉奧拿仲話，山神入唔入到魔，完全取決於MK恩肯唔肯去阿仙奴。
曼城嫌山神周薪貴
先講曼城點解放棄斟山神，據報係領隊哥迪奧拿周一同主席穆巴拉克、行政總裁蘇利安奴同埋足球總監碧格利斯坦會面後嘅共識，因為佢哋一致認為簽山神嘅成個耗費太貴，其中對方所要求嘅薪酬太高，可能會影響隊內成個薪酬架構，驚遲啲個個球星都要求加薪向山神看齊，加上佢哋只肯出2,000萬鎊左右嘅轉會費，同阿仙奴心目中嘅3,500萬鎊相距甚遠。
曼城退出爭奪戰，估唔到又傳車路士有意加入戰團，但曼聯已再出條件誘使兵工廠放人，將隊內已失寵嘅米希達利恩作為交易一部份畀對方，因為紅魔領隊摩連奴喺周一英超主場大勝史篤城3:0賽後，提到冇放「MK恩」喺大軍名單度，係因為佢身心唔再百分百屬於曼聯，似乎暗示對方會走，及後MK恩經理人拉奧拿走出嚟向《泰晤士報》透露，話山神個轉會完全係睇MK恩頭，如果後者唔肯脫「魔」，成個交易就拉倒，仲話家陣係山神加錢換MK恩，而《BBC》亦報稱山神已同曼聯傾好晒個人加盟條件，家陣只等MK恩意願。
不過，兵工廠就算真係放走山神，執番個MK恩都未夠喉，加埋禾確特都傳已經去緊愛華頓體測，離隊幾乎已成事，所以想向多蒙特報價3,000萬鎊再加基奧特，換取奧巴美揚加盟。