律政司司長鄭若驊大宅僭建被指知法犯法，但左報當睇唔到，反而頻頻將矛頭指向民主派，中共喉舌《大公報》前日「報道」港大法律系首席講師張達明位於九龍露明道嘉樂閣嘅住宅有僭建「六年未還原」，結果張達明喺facebook公開處理僭建工程同手續嘅文件，證明6年前已遵照屋宇署還原命令，霎時K.O呢單fake news。
fb公開滿意紙
《大公報》其實喺嗰段報道中，都有引述張達明回覆話收到屋宇署命令後已完成修正，並獲署方覆稱滿意相關工程，但繼續質疑張達明點解冇屋宇署發出嘅「滿意紙」喎！結果張達明喺fb公開屋宇署2011年7月26日發出嘅滿意紙，仲將滿意紙電郵畀《大公報》記者，但《大公報》噚日未見相關報道，冇還張達明清白。
張達明仲不忘幽自己一默，話知道唔能夠以太忙為藉口，「我的的確確一直沒有跟進屋宇署發出的『滿意紙』有否如文件所述已送交土地註冊處登記。因為我的遺漏而為記者朋友帶來誤會及不便之處，特此致歉」。