創業逾30年嘅小店夏銘記麵家今日喺西營盤復業，年逾80嘅創始人夏藩銘夫婦，交棒畀個仔傳承潮式傳統手打魚蛋等美食，新店選址西環德輔道西，食店附設現代工場，店內掛住舊日蔡瀾讚賞嘅牌匾，陳寶珠同杜琪峯都曾經係座上客。
新店重開前冇請食家品評，只請嚟當年光顧勝利道老店嘅名校「小男生」趙先生試菜。趙先生話當年係媽媽帶佢去食夏銘記，好懷念過去勝利道唔少見證自己成長嘅老牌小店，每次喺外國回港度假，必定去搬到油麻地嘅夏銘記幫襯，好想呢啲小店美食傳承落去。
夏銘記始創人夏藩銘體會經營麵店艱辛，一直反對英國學成歸來嘅囝囝Roger接手經營，但Roger決定接手延續魚蛋傳奇。佢話30幾年前父母為生計，接手經營黃大仙警署附近嘅榕江號麵檔，之後搬到勝利道改名夏銘記麵家，因加租再搬到油麻地駿發花園，2015年9月結業，工場則喺去年初結束埋。