特首林鄭月娥噚日向外國人權組織HK Watch發炮，大讚香港法治幾咁好，指出：「我們的法治在所有奉行《普通法》地域中全球第3，亦是亞洲唯一一個可以打入首前10名。」
驟耳聽起嚟好動聽，浸大政治及國際關係學系副教授、「總舵主」陳家洛就篤爆娥特上述言論出處相信係英文《中國日報》去年7月1日嘅一篇文章，但指出黨報講嘅係「司法獨立」，資訊來源只係世界經濟論壇「一個指標」，但事實係法治唔只包括司法獨立，反問林鄭到底想講法治定係只講司法獨立？
陳家洛繼而話根據2016年度World Justice Project報告，香港喺全球113個地區排名係16，若據呢項專門針對法治表現權威研究，香港喺亞太區係排第5而唔係林鄭話嘅亞洲唯一嘅前10名。原來2017年度嘅World Justice Report喺31日發表，陳家洛叫大家查看研究，慎防發表法治意見時一如娥特是但噏。