DQ旋風「殺無赦」，有消息話參加港島區補選嘅香港眾志周庭未必過到確認書一關，民主派已經為周庭諗定Plan B替補人選，就係早前退出民主黨嘅南區區議員區諾軒。估唔到區諾軒又幾快手，噚日率先走入立法會。
八方期間只見區諾軒不停講日文，再望真啲，身邊同行嘅都係日本人，原來佢之前喺日本識咗一橋大學嘅教授，噚日就用朋友身份，帶住呢間大學嘅學生參觀立法會，仲逐一介紹各黨派議員。陪同區諾軒帶團嘅白鴿黨立法會議員尹兆堅就話，一橋大學教授大讚區諾軒日文excellent，有日本團友即時鼓掌和應。
介紹番，網上資料話一橋大學被譽為「亞洲哈佛」，教授都大讚區諾軒，可想而知佢日文有幾好。至於係咪諗緊進軍立法會？區諾軒就大賣關子冇回應。