三合一天文奇觀，本月31日夜晚可能有得睇！網上流傳31日可以睇到3個天文奇觀，包括月全食、藍月亮同埋超級月亮。
3個天文奇觀出現嘅原因，源於月球喺橢圓軌道環繞地球嗰陣，剛好位於最接近地球嘅位置，亦即係處於天文學所稱嘅近地點（Perigee），如果當日天朗氣清，市民抬頭望天就可以欣賞奇景。
係咪真係有得睇？八方問過天文台，科學主任許大偉話，今年內暫時最大、最靠近地球嘅滿月，其實1月2日已經出現咗，又話查實本月30日開始，月亮就會靠近地球，因此觀星友當日已經可以睇到超級月亮。
許大偉又確認31日可以睇到月全食，月食會喺當日下晝6點50分開始，夜晚9點半食甚、即係月圓面中心同地球本影中心最接近嘅時候；如果天氣情況許可，大部份面向東方、無障礙物嘅地方都可以睇到月食，天文台當日仲會做直播㖭！