F1平治車手咸姆頓不時會搭私人飛機周遊列國，而佢又成日都邀請班朋友同行，但估唔到33歲嘅「黑帝」竟然有個怪癖－－唔准其他人用佢嘅廁所！
據英國《太陽報》報道，黑帝喺上年發現機師偷用私人飛機嘅廁所後，即刻將佢炒魷；而近日有個叫維莉（Veronica Valle）嘅模特兒，就呢件事出嚟爆料：「我哋嗰陣飛緊去紐約，點知咸姆頓發現機師喺廁所開大之後，佢嬲到癲咗呀，佢仲話『所有人都知道唔可以喺我個廁所開大』，之後就炒咗個機師。」
維莉早排都同黑帝約會咗幾個月，佢話去到黑帝摩納哥嘅屋企時，又因為用廁所而激親黑帝：「我諗咸姆頓想鬧我，但最後佢同我講，話我應該知道唔可以咁做，佢話我應該用客房個廁所喎。」