中聯辦主任王志民日前語出驚人，話中環西環要行埋，嗱嗱嗱，行埋呢個詞，中國人好敏感，好似一眾人妻咁吖，就唔多方便公開話同老公「行埋」。點解？唔好掩住嘴偷笑，八方相信你懂的！更搞笑喺呢位西環話事人，呢頭話要同娥特行埋，嗰頭又自爆被香港女生冧到暈，結果令呢位港女成為人氣王，唔少網民關注佢有幾多道散手，可以將主任溶化！
現時喺入境處受訓
哦，佢對手又確實好厲害，因為寫咗一封感「（主）任」肺腑嘅信，呢篇名為〈十三天愛上解放軍〉嘅文章，係香港青少年軍、中大畢業生黃逸晴撰寫，原來佢2015年參加咗第5屆香港大學生軍事生活體驗營，接受駐港解放軍訓練後，去年夏天就將入營感受寫成信件交畀駐港解放軍，當然係對駐軍讚到天上有地下無，指佢哋愛護學員、表現友善，例如會關心佢「被子有沒有蓋好」，大家仲一齊唱Beyond嘅《喜歡你》，所以出營時好傷感。其後中央台同新華社等都執到寶，紛紛報道有關文章，仲話訪問咗現時喺入境處受訓嘅黃女㖭。
由於王志民當過軍，難怪特別冧，話呢封信令佢巧滾動，感受到作為「老兵」嘅驕傲同自豪。但一眾網民就唔係咁睇，唔少人覺得呢位港女入世未深，俾人統戰洗腦都唔知，亦有人質疑佢咁樣寫，係咪為咗整靚個CV？而封信嘅真真假假，更加成為熱話！
識睇睇留言
Jackie Lau：同你相處個班梗係做到最親切友善啦！睇下上面趕低端人口個班友幾咁爛仔！
Jack Law：分明想張CV靚啲，等投考公安、AO呢啲共匪飯容易啲
Mui Jeremy：乜嘢叫統戰妳D靚妹都未識……
Cw Kwok：無得救，入晒骨……
柏斯李：假到冇人信
May Ho：入世未深，可憐！
Devin Po：民建聯最新梯隊？
Yan Fan：中共洗腦教學真係有一手㗎！
資料來源：《蘋果》網頁
李八方