武漢機場安檢一名腹大便便但行動可疑的女子，摸到肚子部位時巨肚忽然強烈震動，安檢人員大驚，召警查辦。女子無奈，掀起肚皮，一看原來假肚裏藏了小狗。胎動源頭找到了，女子因為私帶狗隻上機，罰款懲處。那個膠假肚，是淘寶買的便宜貨，標價幾百，衣服下幾可亂真，幫襯者頗多，有人想坐優先座，有人博公司同情免裁員，「裝假狗」上機倒是第一次遭揭發。
假如裝假狗的是潘鄭，林鄭就easy了，對關員說：她太忙了，警覺性不足，包容吓，俾時間佢處理。狗隻需要特別申請才可上機，但林鄭背書，確信她沒有隱瞞，只是無心之失。吓，咁大個人，無腦嘅咩。噢，犯這種低級錯誤，聽落好似匪夷所思，但事實就係咁，咁就只能係事實。無補充了。唔裝都裝咗，唯有以後唔裝。刑責嗎？都丟咗個假肚僭建物了，即是梁振英模式，無講過無僭建，但拆咗，你見到無，就無。裝假狗被斷正，中港兩地都是罰款了事。但裝假狗的女事主，你讓她做律政司？還說如果佢唔做就無人肯做。這不是開他媽的香港法治玩笑嗎！