香港警察隊員佐級協會早前話過，朱經緯案件影響警隊士氣，要求同政府部門會面，警務處長盧偉聰早前接見咗協會，話明白同理解警員對使用武力指引有疑慮同擔心，而公務員事務局局長羅智光噚日亦透露，下周一會同協會會面，聽取對於警察福利同職安健嘅意見，似乎都有安撫之意。
羅智光被問到局方係咪已經有立場，例如會唔會進一步提供福利等時，佢強調開會前唔應該有立場，會以坦誠同開放態度聽意見，透露收到協會嘅來信，話明想討論職業安全保障。
而佢出席立法會公務員及資助機構員工事務委員會會議期間，透露政府合約僱員數目過去10年持續下跌，截至去年6月底，有逾1萬名全職合約僱員，較2006年6月底高峯期少約45%。