呢幾排香港凍冰冰，但一到夏天，又會全城熱辣辣，劏房戶尤其慘，天文台前台長林超英喺商台節目都話呀，香港最受全球暖化影響嘅係劏房住戶，因為劏房又熱又焗又濕，容易滋生唔少古靈精怪病菌：「我懷疑佢哋將來未必熱死，而係因病菌滋生而病死。」
助通風減病菌滋生
佢憂慮香港將要面對好多未知病菌，公共醫療負擔或會好大，建議社福機構可向劏房戶派「USB風扇」，有助通風減少病菌滋生，「每間劏房派3把USB風扇，佢哋（USB風扇）用好少電」，否則若畀電器劏房戶，劏房戶可能因為電費唔捨得用，甚至普通風扇都唔捨得開。
至於住屋問題，佢都有建議，話未來新樓可以參考內地「只租不賣」方式，減低炒賣需求，但強調自己唔係福利主義，深信居住係基本人權。