世事真係無奇不有，噚日民主派初選嘅大日子，就已經有騎呢怪事發生！話說噚日九龍西唔少初選票站都排晒長龍，而八方中午去到石硤尾邨嘅票站時，就見到人頭湧湧，投票人士由街頭排到街尾。話晒石硤尾邨係民協何啟明嘅選區，算係民協地頭，民協馮檢基唔多唔少都有啲主場之利，排隊嘅選民仲好多都係基哥嘅fans㖭。
其中有兩個女fans就相當有心，排隊投票之餘不忘幫手拉票，拎住兩塊寫住「支持基哥」同「支持政壇李克勤」嘅大紙牌為基哥造勢，其中一位盧小姐仲話自己住喺九龍西，由馮檢基做區議員嗰陣，撐到𠵱家呀！之不過點解係政壇李克勤呢？唔通又想暗寸基哥係「政壇關愛座」？盧小姐入票站前尷尷尬尬、紅都面晒咁話：「我覺得係咪係囉！」
稱住西九 上屆投基哥
以為基哥呢兩票袋袋平安？咁你就錯喇。盧小姐投訴票站人員要抄佢身份證號碼，佢覺得係私隱冇畀到，票都唔投就出返嚟，如此睇嚟，佢對基哥嘅愛又唔夠多喎，點算係死忠粉絲？
盧小姐臨走前，八方決定考吓佢，問上屆有冇投畀基哥？佢竟然又話有。咦，基哥上屆轉戰選咗新西喎，無理由盧小姐為咗投票畀基哥，連屋都搬埋啩？到底係真．撐場抑或係搞亂檔卧底？八方當然無從稽考，只係覺得呢位奇女子好盞「鬼」。