中華電力去年成立中電學院，為有意投身電力行業人士提供專業認可課程，首屆喺舊年10月開學嘅課程反應好理想，學額40個卻有逾170人報讀，包括26歲嘅莊鍵輝，佢喺中電任職6年，大讚課程全面，因為本身從事架空天線工作嘅佢，較少接觸地底電纜，課程就令佢獲得好多電力裝置知識。
佢接受政府新聞網訪問時透露，入行全因同樣喺中電做嘢嘅哥哥，「當年完成會考後無所事事」，睇見哥哥加入中電後日日返工，對佢嘅工作好奇，傾多兩句都想試一試。大佢3歲嘅哥哥莊鍵臻入職中電8年，係高壓架空天線帶電工作特級技工，佢話細佬入行後轉變好大，因為要接觸電力系統，處理技術事情，細佬變得成熟謹慎。兩兄弟不時分享經驗。
由於需求殷切，新一屆學額增至80個，仲分埋電力系統同廠房機電兩科。4月就開學嘞，本月19日前可以去到職訓局網頁報名。