這天(14日)禮拜日假期，沙田馬場晨課比較淡靜，但練馬師何良就非常積極，一早到場睇旗下戰馬快跳，緊張到不得了。梗係啦，本周三(17日)谷草夜馬，何良多匹當勇精英分子列陣，當然不想牠們的狀態進度有差池，必須睇緊一些。
晨操專家積奇表示，何良的「超好玩」、「咪走寶」及「幻影飛鷹」今日出跳所見都顯得身靚神態活躍，步伐強勁，狀態均十分出色。
以上三駒還有不少共通點，都是上仗均跑入前四名，甚至勝出近績佳的馬，而且預期今仗皆會配巫顯東上陣。其中角逐四班1650米的「咪走寶」，以往跑短途欠佳，但上仗大幅增程，初跑同程一哩即大勝3.5馬位，表現開竅且明顯進步，今仗留居四班上陣有超卓感，大有機會再下一城。
何況何良、巫顯東近期合作成績甚佳，巫顯東單憑「超好玩」、「咪走寶」及「幻影飛鷹」三匹實力馬，已可望連場得分，再加上其他馬房座騎如大摩的「大四喜」搶分，而勁敵雷神又繼續停賽，因此東東隨時成為騎師王一路奇兵。