練馬師大摩近日外出買馬，人不在港照樣贏馬攞威，繼上周三(10日)憑「鷹雄」勝出一月盃後，剛周六(13日)更贏出「多紅利」、「猛闖」起孖，而「猛闖」之勝，為主帥貝湯美自去年11月贏「明月千里」後，再為波士大摩贏馬。
貝湯美可能會鬆番一口氣，而壓力稍減之下，鴻鵠會否再至？本周三(17日)谷草夜賽摩廐出馬唔多，Tommy仔除要替波士效力之外，亦獲另一廐主蘇保羅招手，將上次由莫雷拉贏到離行離列的「勇冠王」，以及「金多多」交予Tommy仔策騎。
貝湯美季內曾替蘇保羅建功，勝出「白鷺飛翔」，今次倉主又有醒，竟然還接收雷神寶藏，「勇冠王」上場於谷草三班1650米，大勝4馬位，此程實力之強可想而知，今次再跑同班同程，雷神停賽Tommy仔才有得騎，唔搏盡就勢係假咯！