「工作繁忙，不是理由亦都唔係藉口！」
醫管局大律師有心無意之間，一句連消帶打，駁斥青山醫院「睇漏病人血糖讀數」之餘，回窒潘鄭為僭建愈描愈黑的自辯偽語。林鄭毒舌咬定大律師的「精英心態」，此時發揮正面神力，一錘定音，形同兜巴摑了包庇潘鄭「如果這個是事實，咁就唯有係事實」的金句主人！林鄭講「事實」，卻可以「雙重標準」至此，離地到無朋友！未來幾年，香港法治之區的龍門任她搬來搬去，場波唔使收遮戴帽放暗號都知係黑哨假波！林鄭的CY2.0，終極結構性現形！
林鄭和潘鄭兩位好姐妹，重蹈唐宮擠牙膏的覆轍，林鄭忘記晒當年狙擊「逼宮」的狠辣，幫潘鄭大話蓋大話，謬論上再僭建謬論，咁嘅「事實」，掀起更深層次的誠信質疑。傳媒盤點的疑點非但沒有歸於被告，罪證反而愈揭愈多。林鄭叫市民包容，掀開這個被阿爺點讚所謂良好的開局，其實，只是一鍋包藏了老鼠屎的臭粥！向來不沾鍋的林鄭，在熱廚房搵唔到老鼠藥咁話，嗯，又試去7-11買啦。