逢親民主派嘅大日子，保衞香港運動嘅傅振中都會出動，話明係收工男，唔開工又點會有工收？佢噚日就同保衞香港運動成員遊行到廉政公署，話民主派搞初選係偷步為參選人宣傳，有違《選舉（舞弊及非法行為）條例》，企圖製造虛假選舉結果，影響正式補選，仲話初選係佔中搞手戴耀廷策劃，認為係欺騙選民喎。
八方先唔同佢計，建制派疑似參選人鄭泳舜、鄧家彪喺隧道口、車身嗰啲宣傳廣告，係咪更明顯嘅「偷步」宣傳？主辦噚日初選嘅係民主動力喎，同戴耀廷有乜關係？民動召集人趙家賢回應，對傅振中誤以為戴耀廷有份策劃呢次初選十分無奈，強調初選由民動主辦，戴耀廷亦冇加入民主動力。似乎收工男下次開工，都要認真啲，否則應該扣人工。