李斯特城喺1884年成立，前身叫做LEICESTER FOSSE FC。喺1894年加入英格蘭嘅聯賽，25年之後，改名叫LEICESTER CITY。
2015/16球季，首次贏頂級聯賽冠軍嘅李城有三個花名，狐狸、THE BLUES同埋CITY。李城會叫做狐狸，係因為當地本身堅係有好多狐狸，亦係獵狐嘅起源地。
球會最終喺1948/49球季，接納狐狸做球隊嘅花名。同年將金色狐狸頭擺上會徽，仲有LCFC四個字母。
李城最初嘅會徽係盾牌型，用深藍色同埋金色，不過畫功比較有藝術FEEL，睇唔到狐狸嘅眼耳口鼻。1992年第一次作出改變，換成圓型，變成用藍色同黃色，LCFC四個字母唔見咗，只係留返LEICESTER CITY FOOTBALL CLUB。背景新加嘅五葉形裝飾，係抄李斯特嘅市徽，用咗十年之後，作出輕微改變，換咗隻藍色同用咗唔同嘅字體。
一年之後，李城創會125年，整咗個特別版會徽，寫住125年嘅絲帶喺底，狐狸鼻嘅位置加咗啲白色。之後就變成今日嘅樣，無咗條絲帶。