律政司長鄭若驊俾傳媒踢爆僭建，佢話自己因為好忙而一時疏忽，政治敏感度又不足，冇為意有僭建，雖然市民唔接受，但娥特就叫大家要包容，唔好對鄭若驊咄咄相逼，明明犯法都要包容，真係令人嘆為觀止，仲立即俾人拎住娥特呢句說話抽水。
涉披露廉署查馮程淑儀
社民連主席吳文遠噚日就前年喺傳媒同社交平台，披露民政事務局常任秘書長馮程淑儀被廉政公署立案調查，被控違反3項披露調查人員身份罪預審，吳文遠噚日喺庭外係咁抽鄭若驊同娥特水，話自己當初為盡小市民責任舉報高官涉貪，但佢政治敏感度不足，希望被包容吓，又話希望司長唔好寬己嚴人，唔好對佢再窮追猛打。
到場聲援嘅長毛梁國雄亦抽埋一份，用建制派口吻，話冇受過專業法律訓練，亦從冇廉署人員講解有關條例，長毛仲爆料話自己將就藐視立法會案受審，近日收到審訊文件，當中夾有法律意見，原來當初法律意見話可以檢控佢同朱凱廸兩個，但最後就淨係告佢一個人。