早前曼聯（圖）趁住有一個禮拜嘅休息時間，就拉隊去到杜拜集訓。眨下眼假期去到尾聲，曼聯喺杜拜嘅最後一課操練就拍咗段片，一眾球員搭哂膊頭咁跳舞，大晒隊內團結。
段片由盛傳想離隊嘅中場費蘭尼上載到ig，見到一眾球員一邊跳，一邊齊聲大叫。而幾位都被傳會離隊嘅球員，好似米希達利恩，達美安同安達靴里拉等，都有一齊參與，盡顯隊內團結。講番今次杜拜集訓，曼聯都有唔少好消息，除左隊波更加融洽之外，兩位老將卡域克同路爾斯華倫西亞都復操，相信令曼聯喺下半季人腳更充裕。
另外，中場尼曼查馬迪最近決定賣走佢架心愛嘅Mini Cooper，全因為有指佢6呎4吋嘅身高，屈喺架Mini入面，令佢嘅傷患一直都斷唔到尾。所以為自己健康考慮，馬迪惟有換「老婆」。